Faustino Zapico

Información

Esti artículu ye del 24 May 2013, y ta dientro de la sección Artículos, Blogue, L'Arcu de Texu.

Etiquetes pa esta entrada

, , , , ,

25 de mayu ¿Día d’Asturies?

Otru añu más, 25 de mayu. Esta vuelta son 205 los años que pasaron dende esi momentu constituyente en qu’una institución tradicional y propia del Vieyu Réxime, la Xunta Xeneral, reinterpretábase a sigo mesma y declarábase soberana n’ausencia del monarca “lexítimu” (suponiendo que tala cosa esista), asumiendo los atributos d’un estáu soberanu, talos como bandera, exércitu propiu, ministerios y embaxadores, pa entamar la guerra al amu d’Europa, l’Imperiu Francés dirixíu por Napoleón Bonaparte.

Ta claro, y quien esto escribe lleva tiempu diciéndolo, qu’esta fecha tien tolos ingredientes necesarios pa convertise nel día d’Asturies, na xornada de celebración de la identidá colectiva: axunta modernidá y tradición, yá que la xunta subversiva y revolucionaria de 1808 quierse heriede d’aquella que taba furrulando dende posiblemente’l sieglu XII; axunta autodeterminación y españolismu, yá qu’esa Xunta, celosa de les sos prerrogatives tanto escontra los franceses como escontra’l propiu bandu patriota acuyá de Payares, nun quier otro que formar parte de la corona hispánica; axunta conservación y subversión, yá que ye una institución del Vieyu Réxime forciada pola irrupción de les mases na vida política. Tien asina tolos elementos necesarios pa convertise nun elementu d’identidá compartida.

Pero nun pudo ser. La dirixencia política de la Transición, la gran mayoría con perpocu o nulu sentimientu autonomista, y amás fondamente ignorante de la Historia del país, nun foi quien a xenerar la so propia “invención de la tradición”, que diría Hobsbawm, y enfiló en cambiu pel camín de la recreación cuadonguista poniendo como Día d’Asturies el 8 setiembre, teoricamente venceyando la fecha a la batalla de Cuadonga, cuando en rialidá yelo de la Virxe del mesmu nome. Una festividá relixosa convertida en fiesta política, venceyando’l catolicismu cola identidá asturiana, esactamente igual qu’un sieglu anantes les instituciones españoles decidieren poner como “Fiesta Nacional” el 12 d’ochobre, fecha de la llegada de Colón a América, pero tamién fiesta de la Virxe del Pilar, “patrona d’España”. Nun sieglu, la clase política asturiana nun aprendiera nada.

Hubo voces disidentes, pero nun llegaron a cuayar nuna reivindicación sostenida nel tiempu en favor del 25M como día del país. Hubo intentos esporádicos años depués, como’l de 2002, pero tampoco tuvieron continuidá. Izquierda Asturiana (IAS) anantes de subsumise n’aliances que pa poco valieron, celebró per años la fecha contraponiéndola como día d’Asturies alternativu, pero esi filu perdióse, anque agora se tea en procesu de recuperalu. Y agora vemos qu’hai tamién nuevos intentos n’otros sectores, pero desenfocaos dafechu: dende la visión de poner la fecha nel calendariu festivu “pero non muncho” pa nun entrar en conflictu col 8S, al de defender el 25M como día d’Asturies, pero prescidiendo d’una visión asturiana.

Nun se trata de negar que’l 8 setiembre, al marxe de que seya una fiesta relixosa, dende’l momentu en que ta venceyada nel maxín popular a la batalla de Cuadonga, y ésta vista como’l momentu fundacional d’Asturies, algama una dimensión identitaria perfuerte que sería imposible negar. Pero tamién ye verdá qu’esi discursu identitariu llevantáu alredol de Cuadonga, nacíu fundamentalmente nos sieglos XVIII y XIX y perpetuáu na opinión pública al traviés de la escuela y los media, ye parte central del discursu nacionalista español, colo que la identidá asturiana desdibúxase al identificase en definitiva como’l bierzu d’una hipotética “nación española” preesistente y eterna. Un discursu identitariu n’Asturies que nun se vea subsidiariu del españolista tien por fuercia qu’entrar en conflictu col paradigma cuadonguista, reinterpretándolu a la lluz de los fechos históricos, avalaos por milenta datos, y non sumase a él, porque contribúi al enguedeyu y nun permite articular un discursu alternativu.

Y nun ye tampoco cuestión de cayer nun esencialismu opuestu, cayendo nel presentismu ridículu de pretender ver nel Reinu de los Ástures del sieglu VIII un estáu coles atribuciones d’un estáu-nación decimonónicu, sinón d’estremar el fechu históricu de Cuadonga -la batalla que marca l’aniciu de la organización de los ástures nuna estructura política más complexa que la simple federación de tribus- del mitu relixosu y políticu posteriores. Nun ye poco, pero nun ye posible facelo ensin confrontar col discursu dominante.

Pero d’otru llau, les pretensiones de ciertos sectores de la esquierda estatal de facer un 25 de mayu como día d’Asturies ensin Asturies son, como poco, estrañes. Pretender que’l 25 de mayu ye una fecha a celebrar polos asturianos porque ye onde apaez por primer vez espresáu y concretáu políticamente’l conceptu de soberanía popular pero faciendo abstracción del marcu concretu en que se da, esto ye, la Xunta Xeneral, nun ye vidable. De primeres, porque ye falsa la suposición de que la Xunta que naz el 25 de mayu reniegue de l’anterior: tolo contrario, yá que Flórez Estrada y los revolucionarios de mayu intenten lexitimase en tou momentu como representantes de la propia Xunta Xeneral tradicional. Por eso, siendo conscientes de la subversión que supón el güelpe de la nueche del 24 y la sesión restrinxida del 25 con solo 15 diputaos, que son los que tomen les midíes revolucionaries, intenten lexitimase otra vuelta en sesiones posteriores poniendo al restu de los representantes énte los fechos consumaos, pero pidiéndo-yos la so ratificación. La embaxada de Queipo de Llano, conde de Salvatierra, a Londres a firmar la paz con Gran Bretaña y pidir ayuda militar fáise en nome de la Xunta Xeneral, y precisamente por eso los británicos se comprometen a dala, porque nun ven na Xunta Cimera otro que la continuidá cola institución tradicional. Y cuando al otru añu una intervención militar ponga acabu a la Xunta Cimera, la llinia argumental de Xovellanos énte la Xunta Cimera española va ser que la Xunta asturiana ye preesistente a la española, porque tien sieglos d’antigüedá, y polo tanto nun tien autoridá pa disolvela.

De segundes, tamién abulta estraño que los promotores d’esti 25 de mayu ensin Asturies pretendan abstraese del fondu componente identitariu que s’evidencia na fecha. Viendo les midíes tales como la criación de la bandera o les referencies a Asturies como comunidá soberana, reducir el 25 mayu al fechu políticu de la soberanía popular, ensin remitise espresamente a qu’esa soberanía popular ye l’asturiana, y pretender facer d’ello el día d’Asturies ye fondamente contradictorio. Y de terceres, tampoco ye razonable negar que l’actuación de la Xunta Xeneral el 25 de mayu quedó marcada na esquierda asturiana y española como una referencia política de primer orde. Vémoslo en Canga Argüelles, vémoslo en Pi y Margall, vémoslo nos republicanos federales asturianos nel proyectu de Constitución asturiana de 1883 y nes bases pa una Constitución asturiana de 1897. La idea ye siempre la mesma: el parlamentu que tenga Asturies tien de ser la Xunta Xeneral, continuadora histórica tanto de la de 1808 como de la de sieglos anteriores. Y pa rematar, oponese al 8 setiembre por ver la fecha como’l “nacimientu del estáu feudal” evidencia un desconocimientu mui fondu de la rialidá histórica qu’arrodia’l nacimientu del Reinu de los ástures, tan fondu como’l d’aquellos que van tolos años a Cangues a facer la tarascada del osu y Favila.

Por too ello, mal andamos cuando tovía dende la esquierda laica y/o asturianista nun se ye a articular un discursu coherente sobre’l 25 de mayu, lo que supunxo p’Asturies y lo que queremos que seya. Nun dexa de ser un reflexu de lo desorientada que ta -que tamos- la esquierda del país, y de lo necesario que ye articular discursos alternativos en tolos campos. Nesti tamién.

Contestar

Deberíes tar autentificáu pa poder comentar.

Actualizaciones recientes

Comentarios más recientes