Faustino Zapico

Información

Esti artículu ye del 25 Apr 2013, y ta dientro de la sección Blogue, L'Arcu de Texu.

Etiquetes pa esta entrada

, , , ,

25 d’abril. Portugal-Italia, ente la decepción y la esperanza

Italia, 25 d’abril de 1945. El Comité de Lliberación Nacional, organismu políticu-militar unitariu de seis partíos antifaxistes, fai un llamáu a la insurrección xeneral y definitiva pa lliberar una Italia que yá ta, na so mayor parte, en manes de les tropes aliaes o de los partisanos. Ye l’emburrión final al réxime faxista, arrequexáu nel norte de la península. Tres díis depués, el calabre de Mussolini taba colgáu coles pates p’arriba d’una gasolinera milanesa. El 2 de xunu de 1946 celebrábense a un tiempu elecciones a l’asamblea constituyente y un referéndum pa escoyer ente monarquía y república. Nacía la República Italiana y d’ella una Constitución basada nel consensu antifaxista, la más avanzada de la UE xunta la portuguesa y que, tovía güei, pesie a les adulteraciones y incumplimientos de sesenta años de gobiernos de centru-derecha y derecha, sigue en pie, siendo’l marcu de referencia de tola esquierda italiana.

Portugal, 25 d’abril de 1974. El Movimientu de les Fuercies Armaes, organización clandestina formada por oficiales medios veteranos de la guerra colonial n’África, da un güelpe d’estáu qu’achuquina en 24 hores al Estado Novo, el réxime parafaxista puestu polos militares en 1933. Formándose un gobiernu d’unidá de toles fuercies democrátiques, entama’l PREC (Procesu Revolucionariu en Cursu) qu’acabará al otru añu por mor de les presiones internacionales y la traición interna, fundamentalmente del Partíu Socialista. Quedaron, eso sí, les conquistes sociales de la revolución, como la reforma agraria y les nacionalizaciones, y la Constitución de 1975, incumplida y desnaturalizada, pero razonablemente en pie.

A eso se refería Habermas cuando falaba del patriotismu constitucional, esto ye, el sabese parte d’una comunidá política democrático-republicana que fai que los sos ciudadanos podian sentise partícipes y, polo tanto, patriotes de la mesma. Equí, nel Reinu d’España, tracamundióse con ser nacionalista español y ver la Constitución postfranquista del 78 como cosa intocable.

En tou casu, bien ye verdá qu’un marcu constitucional amañosu por sí solu nun ye garantía de nada, si la correllación de fuercies ye desfavorable al campu popular. Italia y Portugal son una bona amuesa d’ello. N’Italia, esmanteláu’l sistema de partíos de la I República pol suicidiu del Partíu Comuinista Italianu y la fundición na llamarga de la corrupción de tolos demás, entra a lo primero de los noventa nun períodu de transición que llega hasta güei: afitamientu d’una derecha non republicana, los berlusconianos y la Lega Nord, que reniega espresamente del consensu antifaxista del 25 d’abril, y delantre d’eso la nada, esto ye, l’ausencia d’una alternativa creible a la esquierda, depués de les milenta mutaciones de los excomunistes –primero PDS, depués DS, agora Partíu Democráticu- que siempre acaben amoriando más pa la derecha, y los graves errores de la esquierda, fundamentalmente Rifondazione Comunista, debatiéndose ente ser una esquierda alternativa o subalterna. La crisis y l’ausencia d’alternatives rozó’l camín a un movimientu qualunquista (del Fronte del Uomo Qualunque, partíu populista reaccionariu de la posguerra), el Movimientu Cinco Estrelles, dirixíu con mano de fierro pol humorista Beppe Grillo y l’empresariu Gianroberto Casaleggio, que tampoco se remite al consensu antifaxista del 45 y que presenta un programa que ye un mecigayu de demagoxa, verticalismu, propuestes mui razonables y euroescepticismu. Con una esquierda ausente de la llucha social y ensin un programa claru de llucha escontra l’austeridá, Italia va a unes elecciones depués d’un añu de gobiernu del procónsul Monti, impuestu pola Troika, y el M5S garra’l votu del malcontentu sacando’l 25’5% del total, convirtiéndose nel partíu más votáu d’Italia na cámara baxa, anque la 3er fuercia parlamentaria por nun dir en coalición.

Con un parlamentu a tres bandes, el polu alredol del PD, el polu berlusconianu y el M5S, y col exprocónsul Monti de convidáu, asistimos a un nuevu espectáculu d’esos a los que mos tien avezaos Italia dende va venti años. Hai qu’elexir un nuevu Presidente de la República porque’l que ta n’exerciciu, l’excomunista Giorgio Napolitano, tien 87 años y acaba’l so mandatu. Dende’l PD, con grandes discrepancies internes, y col apoyu de la derecha berlusconiana y la Lega Nord, voten a Franco Marini, un exsindicalista democristianu, pero nun lleguen al quorum. Marini apaez como un representante de la vieya política, y el M5S, hábilmente, propón a Stefano Rodotà, un xurista con fama d’honestu… y del PD, que recibe amás l’apoyu de tola esquierda agora estraparlamentaria. El PD, nun pudiendo imponer al so candidatu consensuáu cola derecha, por nun-y dar la razón al M5S, acaba votando otra vez a Giorgio Napolitano, que de siguir vivu acabaría’l so mandatu con… 94 años. Mentanto, Bersani, el candidatu a xefe de gobiernu y que ta acabante de ganar les elecciones lexislatives, dimite del cargu y de secretariu xenral del PD, al igual que la so presidenta. En medio d’un escenariu patéticu, con un Berlusconi que se daba por enterráu pero qu’amuesa tar más vivu que los sos rivales, un centru-esquierda fiel vasallu de la Troika que nun ye a formar gobiernu, una esquierda ausente y un M5S reforciáu pero cola mesma ambigüedá, el futuru d’Italia ye inciertu.

¿Qué dicir de Portugal? Con un de gobiernu del Partíu Socialista con José Sócrates al frente dende 2006, aplicando la política social-lliberal propia d’esi partíu, la crisis de 2008 oblígalu a amoriar tovía más pa la derecha baxo los dictaos de la oligarquía interna y la Troika. Nun ye abondo pa calmar los petites de la banca. En 2011, a les puertes del rescate, Sócrates convoca elecciones pa perdeles y qu’entre la derecha confesa a rematar el llabor que’l so partíu empezó: l’esmantelamientu definitivu de les conquistes sociales de la revolución del 74. El nuevu gobiernu del ultralliberal Passos Coelho lleva faciendo pasar a la gran mayoría de los diez millones y mediu de portugueses un auténticu calvariu, colos servicios sociales esmantelaos, los impuestos afogando a pequenes empreses y consumidores, y xornales de fame pa una clase obrera precarizada y amedranada. Viéndense les empreses públiques nacionalizaes na revolución a preciu de saldu, pa gran gayola de los especuladores internacionales, y cuando’l Tribunal Constitucional valta cuatro de los nueve puntos del plan gubernamental d’austeridá, la respuesta del gobiernu ye nuevos retayos nos servicios públicos. Hai, eso sí, una esquierda potente y organizada, tanto política como sindical y social, qu’intenta para na cai lo qu’impón la mayoría parlamentaria.

¿Cuánto va durar la pota ensin ferver l’agua? N’Italia nun fueron quien a imponer dafechu’l programa neolliberal porque lu valtaron con una montonera de referéndums vinculantes, figura central del constitucionalismu italianu sabiamente usada pola esquierda. En Portugal hai un Tribunal Constitucional que s’atreve a valtar un plan d’austeridá porque entra en contradiciión cola Constitución del 75. N’entrambos países hai patriotismu constitucional porque hai razones oxetives pa tenelu, pero nel Reinu d’España non, porque la tan emponderada Constitución del 78 foi la primer carta magna de la globalización, diseñada pa, cuando tocara, ceder soberanía pal esterior, por nun falar de l’ausencia de referéndums vinculantes o d’una carta de derechos que nun son de cumplimientu obligatoriu pol gobiernu de turnu.

Esi ye’l pecáu orixinal del Reinu d’España. Eso que llamen democracia y que dellos descubren agora que nun lo ye nun vieno d’un consensu antifaxista como n’Italia y Portugal, sinón d’un pautu indignu ente la élite franquista que sabía que nun podía gobernar como anantes y una esquierda ganosa de tocar poder de la forma que fuera. D’aquella rendición vienen agora les otres. El Reinu d’España, los pueblos que lu conformen, necesiten tener el so propiu 25 d’abril, los procesos constituyentes que mos lleven a, como dicía Marx, constituyir l’asociación republicana de productores llibres y iguales. Italia y Portugal tamién tienen razones abondes pa repetir el so 25 d’abril. Polo menos tienen daqué pa celebrar y un espeyu nel que mirase. Que s’esparda l’exemplu.

Contestar

Deberíes tar autentificáu pa poder comentar.

Actualizaciones recientes

Comentarios más recientes