Faustino Zapico

Información

Esti artículu ye del 07 Feb 2012, y ta dientro de la sección Blogue, L'Arcu de Texu.

Etiquetes pa esta entrada

, , , , , , , ,

¿Y agora?

Elecciones anticipaes. Vista la situación de bloquéu políticu, ye la situación más razonable nun sistema parlamentariu. Precisamente por razonable ye la más inesperada. Si el gobiernu nun ta respaldáu pola mayoría na cámara, y la mayoría nun ye a presentar una alternativa de gobiernu, lo normal ye dir a otres elecciones.

La cuestión ta en si ye razonable, nuna situación dramática como la que tenemos, unes elecciones anticipaes con un marafundiu de perres n’encamentar el votu y organizar el procesu. La cuestión ta en si estes elecciones van solucionar daqué si se repiten los resultaos. La cuestión ta en que la obligación de los 45 diputaos elexíos en mayu ye la de ponese mínimamente d’alcuerdu, especialmente ente los 25 dipuaos de la derecha confesa, dao que comparten programa hasta’l puntu de qu’en dellos aspectos del mesmu los redactores fueron les mesmes persones con nome y apellíos.

El PSOE, y en menor midida IU, nun tan dispuestos a que se barra debaxo l’alfombra y se desmonte la rede clientelar que fueron texendo nestes décades. El PP nun asumió tovía la so derrota electoral de mayu y xubió l’apuesta poniendo a Gabino de Lorenzo de procónsul pa torgar a Álvarez Cascos. A un tiempo, fai la pinza col PSOE pa que nun-yos esmantelen el duernu entamáu conxuntamente nestos años. FAC, tanto la persona como’l partíu, entró como namás sabe facelo: como un elefante nuna cacharrería. Presu de les espectatives xeneraes, nun pudo cumplir con elles, tanto por nun tener la mayoría como por nun ser lo que estremaos sectores quixeron ver n’él. Nin ye la esperanza del asturianismu, nin ye’l bulldozer facedor d’obres publiques, nin ye l’abanderáu del xuegu llimpiu, nin ye’l meritócrata arrodiáu de mentes brillantes.

El contestu, con tolo terrible que ye, ye’l menos malu pal presidente. El PSOE sigue en KO técnicu y ta en plenu procesu internu. IU ye la potencialmente más beneficiada, yá que ye agora la única espresión visible de la esquierda pa la gran mayoría de la sociedá asturiana y fexo escaecer que foi corresponsable de les barbaridaes del PSOE. Al PP asturianu gárralu ensin facer el congresu que tome’l relevu d’Ovidio Sánchez y la clá, polo que vense obligaos a improvisar candidatu o a repetir: ¿Espinosa? ¿Aréstegui? ¿Goñi? Mercedes Fernández ¿Atreverase a encarase directamente col so facedor? ¿Cómo lo interpretaría l’electoráu conservador? Al coincidir coles elecciones andaluces, el desmbarcu del PP estatal va ser muncho menor: Asturies cunta muncho menos qu’Andalucía.

Escenariu previsible: la xuba de l’abstención, la entrada d’UPyD na Xunta y la baxada en votos de toos, polo que’l resultáu final pue asemeyase muncho al de mayu anque l’aritmética podría propiciar un gobiernu en minoría del PSOE col sofitu d’IU y, llegáu’l casu, d’UPyD. Dramático. La vuelta del PSOE, con ganes de venganza, y col discursu más nacionalista español-cosmopaletu que nunca, pue valir p’aneciar nel procesu d’esterminiu cultural al que mos tien avezáu nestos años.

¿Y la esquierda nacionalista? Tovía ensin cambiar el chip del cambiu de ciclu que s’abrió en mayu pasáu. Neses condiciones, ensin redefinir discursu nin estratexa, presentase énte la sociedá asturiana a pidir el votu paez daqué irresponsable. La cuestión ye, pa nós y pa toos ¿Y agora qué?

Contestar

Deberíes tar autentificáu pa poder comentar.

Actualizaciones recientes

Comentarios más recientes